Na actualidade, as infraestruturas en solos industriais e parques empresariais de Zona Franca superan os tres millóns e medio de metros cadrados e albergan 350 empresas.
Esta andaina comezou na década dos 50, coa posta en marcha da Área Industrial de Balaídos, que é o maior polígono empresarial de Vigo. Acolle a planta máis produtiva da firma Peugeot-Citroën no mundo, o que propiciou a creación do Clúster do Automóbil de Galicia. Completan esta oferta de infraestruturas empresariais do Consorcio a Área Comercial de Bouzas, o Parque Industrial de A Granxa, que alberga o Centro de Iniciativas Empresariais, e o Parque Tecnolóxico e Loxístico, que engloba a Cidade do Téxtil. Estes 4 parques xeran 18.800 empregos directos, o que supón o 25% do emprego da comarca, e 40.000 indirectos.
